Marta Grænlandsfari

Marta G. Guðmundsdóttir

        Marta G. Guðmundsdóttir er 37 ára kennari, búsett í Grindavík. Marta á eina stúlku sem er ellefu ára gömul og heitir Andrea Björt Ólafsdóttir.

        Marta greindist með brjóstakrabbamein í október 2005 og gekkst undir uppskurð ásamt lyfja- og geislameðferð í kjölfarið sem lauk í júní 2006. Meðan á því ferli stóð reyndi hún að setja sér ýmis markmið til að ná fyrri heilsu að meðferð lokinni. Marta einbeitti sér að því að hreyfa sig eins og þrek leyfði og einnig fannst henni mikilvægt að reyna að lifa sem eðlilegustu lífi þrátt fyrir veikindin og tók þátt í daglegu amstri eins og hún treysti sér til. Líðan hennar var misjöfn í þessa átta mánuði sem meðferðin tók, sumir dagar voru henni mjög erfiðir eins og gefur að skilja og þá reyndist henni hjálplegt að stefna á að gera eitthvað sem hefði jákvæð áhrif um leið og heilsa leyfði á ný.

       Marta setti markið hátt og ákvað í samráði við Krabbameinsfélag Íslands að stefna á það stóra verkefni að fara á gönguskíðum yfir Grænlandsjökul. Allt frá því að krabbameinsmeðferðinni lauk hefur Marta byggt sig upp, þjálfað og undirbúið með þetta markmið í huga og nú er hún loks lögð af stað, tæpu ári síðar. Í vetur hefur hún æft sig á gönguskíðum, bæði með styttri ferðum í Bláfjöll og nágrenni ásamt því að fara í margra daga ferð á Sprengisand í mars sl. Sú ferð var henni dýrmætur undirbúningur þar sem hún gat reynt búnað og skíðafærni við misjafnar aðstæður. Marta gekk einnig á Snæfellsjökul ásamt styrktaraðilum sínum frá Deloitte á sumardaginn fyrsta.

       Marta leggur nú upp í þessa löngu ferð yfir Grænlandsjökul til að vekja athygli kvenna á mikilvægi þess að fara reglulega í brjóstaskoðun og til að afla fé til frekari rannsókna á brjóstakrabbameini. Hægt er að leggja söfnuninni lið með því að kaupa póstkort á kr. 1.000 sem Marta mun póstleggja frá Grænlandi að leiðangri loknum og mun sá ágóði renna til áframhaldandi baráttu gegn brjóstakrabbameini. Helstu styrktaraðilar sem gera Mörtu kleift að fara þessa ferð eru Deloitte, 66°N, Everest og Fjallakofinn ásamt Krabbameinsfélagi Íslands.

     Leiðangurinn áætlar að senda reglulega frá sér upplýsingar meðan á ferðinni stendur og verða þær birtar hér á bloggsíðu mbl.is jafnóðum og þær berast. Fylgist með þessari kjarkmiklu konu í einstæðum leiðangri og notið tækifærið til að sýna stuðning ykkar við gott málefni.