08.06.07 - Húfulaus föstudagur

Annar ótrúlegur dagur (föstudagur) og færið verður betra og betra. 31 km í dag og glaðir hundar. Þegar veðurguðirnir eru okkur hliðhollir þá er ferð yfir Grænlandsjökul unaðsleg.
Glampandi sól, vindur skáhallt í bakið, hundarnir hlupu léttilega áfram. Spurning hverjir dilluðu rófuðum meira af gleði, fjórfætlingarnir eða þeir tvífættu. Þessi dagur verður geymdur með góðu minningunum, meira að segja var hægt að ganga húfu- og vettlingalaus að hluta til í dag. Allir nutu veðurblíðunnar og 31 km var lagður að baki án einnar grettu. Bara ánægja.
Á morgun laugardag eru 35 km eftir að skriðjöklinum og ef færið verður gott seinnipart dags munum við hefja för okkar stuttan spöl niður á við. En nú liggur engum á lengur. Leiðangursmenn eru uppteknir af því að njóta síðustu kílómetranna til hins ítrasta. Þetta verður spennandi, hversu erfiður verður skriðjökullinn? Hversu blautt verður þar? Hvernig mun ganga að koma hundunum niður á hafísinn? Hver sér fyrsta fjallstoppinn sem ekki er þakinn ís?

Kveðja, Christian Eide

07.06.07 - Laus við Naqqajaq

Þvílíkur dagamunur! Allir kátir á ný, það rættist úr fimmtudeginum sem byrjaði með því að tjald fauk út í veður og vind, yfirferð dagsins var 32 km. Eftir þrjá daga í blindhríð létti loksins til. Snjórinn er þó engu minni og færið verður örugglega í þyngri kantinum næstu kílómetrana, en mestu skiptir að losna við rokið og fá betra skyggni. Síðan má reikna með sköflum þegar nær dregur ströndinni sem geta verið þreytandi yfirferðar, frosið haf eins og slíkt færi er stundum kallað. En nú eru allir með sól í sinni og ánægðir með veðrið. Hópurinn átti gott forskot inni frá fyrri hluta ferðarinnar og er því ekki í neinni tímapressu. Hér er skýrsla fararstjóra frá fimmtudeginum 7. júní:

Frábær dagur! Glampandi sól, svalur vindur í bakið og batnandi færi. Við erum ánægð með þriðja tuginn, það urðu 32 km í dag sem voru ekki gefnir því snjórinn er ennþá djúpur. Við erum smeyk um að það verði of mikið logn á morgun því Grænlandshundum er illa við of mikinn hita. Kristian Gab. stóð sig aftur frábærlega fremst með staðsetningartækið. Hann er í þessari ferð til að æfa sig fyrir Suðurpólinn og er byrjaður að sýna alvöru heimsskautatakta. Að veislu lokinni gaf Herman öllum skærgula stuttermaboli með eigin leiðangursmerki áprentuðu. Þessa boli hefur hann selt til að fjármagna ferðalagið sitt, alveg frábært hjá honum. Við pökkuðum bolunum vel niður svo þær myndu ekki lykta jafnilla og við gerum núorðið.
Nú erum við stödd 66 km frá toppi skriðjökulsins. Ég hlakka mikið til að sýna hópnum austurströndina. Sá sem sér fjöllin fyrstur fær fullt af gosi í verðlaun og langt samtal í gervihnattasímanum. Gaman á morgun, þá er föstudagur og helgin framundan :o)

Kveðja, Christian Eide.

08.06.07 - Marta skrifar:

Halló.

Morguninn byrjaði ekki vel þar sem feðgarnir (sem ætla á Suðurpólinn) misstu eitt af tjöldunum. Það fauk í burtu þannig að nú höfum við bara tvö tjöld. Við stelpurnar erum því allar saman í litla gula tjaldinu aftur og erum alsælar með það og hjá okkur er allt í röð og reglu... he, he. Frábært veður í dag og við að nálgast lokamarkið, allir orðnir spenntir að komast niður af jöklinum á sunnudaginn. Eigum að byrja kl. 4 á laugardagsmorgun.

Kær kveðja, Marta Grænland.

Viðtal við Mörtu; Í býtið á Bylgjunni:

Fimmtudaginn 7. júní var rætt við Mörtu í þættinum Í býtið á Bylgjunni. Hlustið á Mörtu á Grænlandi, slóðin er þessi:

   http://bylgjan.is/?PageID=1857

 

07.06.07 - Þetta styttist...

Halló allir.
Þetta er búinn að vera langur dagur en við byrjuðum kl. 4 í nótt og náðum settu marki eftir 10 tíma göngu. Nú eru allir orðnir þreyttir og svangir. Veðrið var mjög gott í dag og spáin ágæt næstu daga. Við þurfum að ganga 34 km á dag til að ná niður á tíma en við ætlum að vera komin niður af risanum á sunnudaginn.
Minnir enn og aftur á kortin, ekki gleyma að kaupa...

Kær kveðja,
Marta Grænland.

06.06.07 - Ingrid skrifar:

Miðvikudagur var þungur fyrir hundana og eftir 25 km gáfust þeir upp. Við höfum nú gengið u.þ.b. 60 km í djúpum snjó og ég vona innilega að færið fari að lagast. Það eru tæpir 100 km eftir að toppi skriðjökulsins. Við sem ætluðum að hespa því af á þremur dögum en það er víst náttúran sem ræður en ekki við mannfólkið. Veðrið í dag var sól - regn - snjókoma - þoka - rok. Kristian Gab. var frábær fremst með staðsetningartækið í djúúúúpum snjó. Á morgun fimmtudag ætlum við á fætur kl. 04.00. Það lítur út fyrir að veðrið sé að lagast en ég óttast að það verði of hlýtt fyrir hundana. Þess vegna er betra að fara snemma af stað. Við erum í fínu standi ennþá fyrir utan nokkur nuddsár, hælsæri og slíkt. Ég er sennilega vinningshafinn í þeim efnum enda búinn að vera á jöklinum nú í fimm vikur.

Kveðja, Ingrid.

06.06.07 - Dagdraumar

Halló.

Dagurinn í dag (miðvikudagur) var svipaður og í gær, hjakk og aftur hjakk, mikill snjór og erfitt færi. Hundarnir eiga í basli með að draga sleðana og leggjast bara niður og neita að halda áfram. Endaspretturinn ætlar að verða erfiður viðureignar en veðurspáin lofar góðu þannig að þetta mun hafast. Ákveðið að byrja eldsnemma í fyrramálið, vakna kl. 04.00 og ganga og ganga. Það er basl að koma upp tjaldbúðum í öllum þessum blauta snjó þar sem þungt er að athafna sig. Hópurinn er farinn að sjá fjölbreyttan mat og alls kyns kræsingar í hyllingum og láta sig nú dreyma langa dagdrauma um allt það sem er gott og notalegt og var einu sinni daglegt brauð! En hugurinn ber mann hálfa leið og takmarkið nálgast óðum.

Kær kveðja, Marta.

Naqqajaq: Ekkert skyggni, blautt og þungt færi.

Piteraq - Naqqajaq

Á Grænlandi er stormur sem kallast Piteraq. Hann er einn af þeim öflugustu í heimi og getur farið yfir allt að 300 km/klst. Hann er oftast staðbundinn og fer ekki endilega yfir stór svæði. Hann myndast þegar það er slæmt veður úti á Grænlandssundi og kalt loft hvílir yfir ísnum. Í vonda veðrinu stígur hlýja loftið og skyndilega sogast kalda loftið niður af ísnum með miklum hraða og á fáum mínútum hefur kalda stillan breyst í gríðarlegt veðravíti; blindbyl sem getur verið 20-40 m hár. Lendi maður í slíkum hremmingum þá reynir fyrst og fremst á samvinnu leiðangursmanna til að tjalda með hraði og koma sér í skjól. Nú hefur okkar lið verið í því sem er öfugt við Piteraq og kallast Naqqajaq. Það er leiðindarok sem blæs upp á ísinn frá ströndinni vegna lægðar sem liggur þétt uppi við land og ýtir vindinum upp á jökulinn. Því fylgir oft mótvindur, snjór, slydda, heitt loft, þoka og blýþungt færi.
Það er því greinilegt að hópurinn hefur sýnt mikla þrautseigju að komast þó þetta langar dagleiðir við afar slæm skilyrði.

Séð úr þyrlu; Piteraq-stormur þeysist yfir ísinn:

05.06.07 - Marta skrifar:

Hæ, þetta var nú meiri dagurinn (þriðjudagur). Við vorum að hjakkast og hjakkast og ekkert gekk, mikill snjór og erfitt að ganga. Síðasti klukkutíminn var algjör martröð. Vonandi verður þetta skárra næstu daga en endaspretturinn er farin að kitla mannskapinn og flestir farnir að telja niður.

Kær kveðja, Marta.

05.06.07 - Basl...

Þungur dagur fyrir hundana. Við erum nú komin á svæði þar sem er mikill nýfallinn snjór. Þegar ég tek af mér skíðin sekk ég upp að hnjám í snjónum.

Við enduðum með að basla 25 km og ég efast um að við komumst lengri vegalengd á morgun miðvikudag. Við erum nú 123 km frá efsta hluta skriðjökulsins og reikna má með að heill dagur fari í að komst þar niður. Í kvöld erum við 2100 m.y.s.

Veðrið í dag hefur einkennst af austlægum vindi sem snerist meira í suður síðdegis. Nú í kvöld er vindurinn vestlægur. Vona að sú átt haldist. Herman er búinn að uppgötva að það þykknar alltaf upp þegar við borðum hádegismat; þrátt fyrir mismunandi tímasetningar. Í kvöld er pastamáltíð með kjöti og nýbökuð kaka "a la fararstjóri".

Jákvætt í dag 1: Okkur tókst að komast 25 km þrátt fyrir færið.

Jákvætt í dag 2: Það var gaman hjá okkur þrátt fyrir allt.

Jákvætt í dag 3: Videó-vélin mín virkar aftur.

Neikvætt í dag 1: Ekki hægt að byggja Igloo snjóhús úr snjónum.

Neikvætt í dag 2: Það er lítið eftir af smjöri og sykri.

Morgundagurinn verður spennandi, ætli færið verið betra? Verður vindurinn í bakið? Sól í andlitið? Vonandi. Í fyrramálið verður vakið kl. 06.00.

Kveðja, Christian Eide.